மகிழ்ச்சி ஊற்றினை மாந்தர் தேடியே
மாநிலம் எங்குமே மயங்கி அலையும்
மகிழ்ச்சி அடைய மனமது துணிந்து
மாறான செயலையும் மனமுவந்து செய்திடும்
மகிழ்ச்சிதனை அடைந்தாலும் மனமது அடங்காது
மயங்கும் போராடிப்பெற்ற மகிழ்ச்சியில் அதிருப்தி
மகிழ்ச்சியை மேலும் மனமது வேண்டும்
மாகடலின் ஒயாத மாஅலைகள் போலவே
மகிழ்ச்சியின் நிறைவை மாற்றுஇடம் தனில்தேடும்
மகிழ்ச்சி வேறிடம் மறைந்து இல்லையே
மகிழ்ச்சி பிறரை மகிழ்விக்க வளரும்
மகிழ்ந்தவர் முகத்தின் மலர்ச்சியில் தோன்றும்
மகிழ்ச்சியை உன்உள் மனதினில் தேடு!
மகிழ்ச்சி ஊற்று மளமளவெனப் பெருகும்
மகிழ்ச்சி எங்கும் மலர்ந்திடும் மலர்
மகிழ்வோடு அதனை மாலையாக்கி சூடு!
கருத்துகள் இல்லை:
கருத்துரையிடுக